傳姜濤購入西環維壹海景單位 想做鄰居同街坊 最低消費要幾多錢？
就算閣下一向唔留意地產新聞，都好大機會知道Mirror成員姜濤以1,800萬購入西環維壹中層海景單位嘅消息，對姜糖嚟講，可能好想立刻搬去維壹同偶像做鄰居，想像一下有一日電梯門打開，就遇到姜濤……或者如果喺附近屋苑住，夜晚落街放狗散步或者跑步，都可能有機會撞到偶像跑步……據說地產公司話近幾日維壹無論租盤定出售盤，詢問度都急升，究竟如果想同姜濤做鄰居或者街坊，成本大約要幾多呢？維壹嘅賣點除咗同姜濤做鄰居之外，仲有乜嘢賣點呢？
位於德輔道西嘅維壹，係於2012年2月入伙，提供103個單位，實用面積由662呎至2,624呎，過去30日，平均成交呎價為$27,190，以擬似姜濤購入嘅同款單位，實用面積662呎，售價約1,800萬，而由於自住客多，現時放盤數量唔多，如果想搵返同姜濤購入同呎數嘅中層單位，售價約2,000萬，月供約$44,210，低層就平啲，約1,850萬，月供約$39,625；如果要租，呢款662呎單位，月租約$40,000。
如果想成本低啲做姜濤街坊，唔怕大廈樓齡高嘅話，可以考慮同維壹相隔一座工業大廈嘅均益大廈，根據成交紀錄，421呎單位成交價約540萬，呎價$12,927，若果租嘅話，397呎單位月租約$12,800。想要樓齡新啲嘅話，可以考慮預計今年入伙嘅KENNEDY 38，單位實用面積由229至1,000呎，229呎單位成交價約635萬，平均呎價$27,712。
位於德輔道西嘅維壹，係於2012年2月入伙，提供103個單位，實用面積由662呎至2,624呎。
擬似姜濤購入嘅同款單位，實用面積662呎，售價約1,800萬至2,000萬，月供約由$39,625至$44,210；如果要租，月租約$40,000。
呢款屬兩房單位，其中一房為主人套房。
如果想平做姜濤街坊又唔怕大廈樓齡舊，可以考慮均益大廈，細單位月租約$13000。
全港最強校網 雲集聖保羅男女中、英華女校
維壹的業主除咗姜濤，據說仲有容祖兒、謝霆鋒同Twins嘅阿嬌都係業主，而賣點除咗同巨星為鄰，單位仲座擁無敵昂船洲海景，而設施仲包括室內泳池、兒童遊樂場、兒童遊戲室、健身室、桑拿浴室、音樂室、閱讀室 / 溫習室、宴會廳、柔道 / 瑜伽練習室、平台花園等。而且位置相當方便，徒步往香港大學港鐵站，大約只需1分鐘，樓下有電車、巴士路線1,10及101等途經，相當方便。徒步5 分鐘內，可到達西寶城購物商場，但西環一帶由於係舊區，故此附近嘅食肆同購買日用品嘅店舖選擇相當多。
不過若閣下身為父母，維壹另一個超吸引嘅賣點，就係屬於名校林立嘅中西區11校網，名小學有嘉諾撒聖心學校、聖士提反女子中學附屬小學、聖公會聖彼得小學、英皇書院同學會小學、李陞小學及般咸道官立小學等，能升讀名中學嘅機會相當高。而中學Band 1名校陣容亦十分矚目，包括聖保羅男女中學、英華女學校、聖保羅書院、聖若瑟書院、英皇書院等，相信各位姜糖想搬屋，前夫都好支持。
單位座擁無敵西區海景，係維壹一大賣點。
由維壹徒步往香港大學站，只需幾分鐘。
維壹屬港島中西區校網，Band 1名校林立。
text/Joyce
photo/HKET圖片庫
港生活人氣本地熱話
↓【限時搶⚡】原箱高鈣梳打餅↓
↓黑芝麻 / 芥末味｜口感香脆、高鈣健康↓
【請您去】iSQUARE國際廣場「爆」趣童玩之旅💥
↓ Striking爆炸糖Strikids(爆炸仔)小隊✨ + 本地懷舊玩意元素🙌 ↓
