9個你未必留意嘅搭港鐵違例行為 未經許可拍片同錄音原來罰款$5,000！ 玩自動電梯可以被判坐監？！
香港人嘅生活同港鐵可謂息息相關，早前港鐵宣布會提高罰款至$1,000，打擊逃票及濫用2蚊乘車優惠嘅乘客。但大家可知道根據香港鐵路附例，喺港鐵範圍內有好多可能我哋或朋友有機會做過嘅行為，原來都係「犯法」㗎！而且仲要罰款甚至要坐監！例如將腳放喺座位上，原來可以罰款$2,000；喺鐵路處所範圍內粗言穢語而影響到他人，可以罰款$5,000㗎！玩自動電梯可以被判坐監㖭呀！咁如果喺鐵路範圍賣嘢，大家估吓最高處罰係點樣呢？
============
同場加映：
【家居達人】潮濕天氣保養鞋履6招 著2日擺3日？塞報紙免發霉！
============
以下呢啲行為，可能大家都曾唔覺意做過，但原來根據香港鐵路附例，係違例㗎！
1.不得將腳放在座位上
香港鐵路附例嘅「第IV部 乘客的行為」入面嘅第22條，係咁講：「任何人不得將腳放在鐵路處所內任何部分的任何座位上。」，最高處罰為罰款$2,000。
就算無乜乘客，或者真係好攰，千萬唔好將腳放上港鐵座位，否則會被罰款$2,000㗎！
2.禁止吐痰及亂丟垃圾
根據第IV部乘客的行為入面嘅第24條，吐痰同喺唔適當地方丟垃圾：「任何人不得─ (a) 在鐵路處所的任何部分吐痰；或(b) 將扔棄物放置或拋棄在鐵路處所內，但放置或拋棄在為此目的而設置的容器內則除外。」，最高處罰為罰款$5,000。
喺港鐵範圍吐痰或亂丟垃圾，隨時可被罰款$5,000。
3.禁止唱歌、跳舞及演奏樂器
近年好多人喜歡喺街頭busking或者跳街舞，但原來千萬唔好揀喺港鐵範圍內表演，因為根據乘客的行為部分嘅第26條：「除非得到港鐵公司的特准，否則任何人不得在鐵路處所的任何部分唱歌或跳舞，或演奏任何樂器或以任何樂器作表演。」，最高處罰為罰款$2,000。繼而引伸出第26A條：「除非得到港鐵公司書面特准，否則任何人不得在鐵路處所的任何部分開著或使用或企圖開著或使用任何會產生噪音的收音機、卡式機、雷射碟機、錄音機、便攜式無線電視機或任何其他相似的器件。」，最高處罰同樣為罰款$2,000。
雖則話近年好流行街頭busking或者跳街舞，但原來喺港鐵範圍內表演，或者大聲播放音樂造成噪音，可被罰款$2,000。
4.唔可以玩扶手電梯
好多人都試過喺扶手電梯度反移動方向跑上跑落，本來都係玩吓，但跟據28.A條例「不恰當操作設備等」入面，有指明呢個係屬違例行為：「(1) 除非得到港鐵公司特准，否則任何人不得─(c) 不按港鐵公司所指示的方式及秩序上落任何自動梯，或企圖不按港鐵公司所指示的方式及秩序上落任何自動梯；(d) 在或企圖在向某方向移動的自動梯或活動平台上向其他方向行走；(e) 坐於任何自動梯或活動平台，或其扶手或任何部分之上；」，咪以為只係屬口頭警告或輕微懲罰，原來最高可以罰款$5,000及監禁6個月㗎！
好多人都試過喺扶手電梯度反移動方向跑上跑落，但原來喺港鐵範圍玩扶手電梯，最高可以罰款$5,000及監禁6個月㗎！
5.飲醉酒神智不清不宜逗留
如果飲醉酒，或者服用藥物後出現神智不清而被職員認為唔應該逗留喺港鐵範圍，亦應該要聽話離開，根據第28F.有關「神智不清」嘅規例咁講：「任何人如因飲用或服用或濫用酒精、藥物或藥品而致神智不清，或處於人員按其絕對酌情決定權認為不合適的狀況，該人即不得進入或留在或企圖進入或留在鐵路處所。」違例者最高處罰為罰款$2,000。
6.不得粗言穢語、塗鴉或未許可下拍片及錄音
喺28H.條「粗言穢語」之下，其實分咗幾類行為，不單唔可以粗言穢語或行為不檢影響到他人，塗鴉或損壞告示及標誌等，固然唔合法，但原來喺未經港鐵公司同意下，拍片及錄音都係唔啱㗎！
「(1) 任何人於鐵路處所之上，不論何時─(a) 不得使用任何威脅性、粗穢、淫褻或使人反感的言語，或鬧事、行為不檢、行為不雅或作出使人反感的行為；(b) 不得髹上、書寫、繪畫或貼上任何文字、圖像或字樣於鐵路處所的任何部分，包括任何列車或裝置、家具、裝飾或設備，或任何公布、告示、一覽表、時間表、宣傳品、標誌、數字或字母，亦不得故意弄污或弄髒或破損、切割、抓刮、撕扯、噴潑、毀損或損壞鐵路處所的任何部分，包括任何列車或裝置、家具、裝飾或設備，或任何公布、告示、一覽表、時間表、宣傳品、標誌、數字或字母，亦不得移走或拆去此等物品或物件；(c) 不得損壞鐵路處所上任何財物；(d) 不得騷擾任何人，或故意對他人的舒適及方便造成干擾；或(e) 不得在未獲港鐵公司書面同意並受依照港鐵公司所施加的條款及條件規限的情況下，使用任何錄音或錄影或拍攝器材以進行訪問或拍錄或製作影片或錄像。」而最高處罰為罰款$5,000。
喺未得港鐵公司同意下，使用任何錄音或錄影或拍攝器材以進行訪問或拍錄或製作影片或錄像，原來最高可被罰款$5,000。
7.唔可以賣嘢
根據第30條「禁止販賣」：「除非得到港鐵公司書面特准，否則任何人不得在鐵路處所內出售、為出售而展示或要約出售任何貨品、貨物或服務。《公眾衞生及市政條例》(第132章)第86、86A、86C及86D條適用於本條所訂的罪行，猶如該罪行是該條例第83條所指的小販罪行一樣。」因此刑罰都幾重手，罰款為$5,000及監禁6個月。
喺未經港鐵公司同意下，喺鐵路處所範圍內賣嘢，原來可被罰款為$5,000及監禁6個月。
8.唔可以帶動物入港鐵範圍
雖然好多人都想帶埋自己嘅寵物搭港鐵，但根據第28條「鐵路處所禁止動物進入」：「除港鐵公司行使其絕對酌情決定權許可或准許者外，任何人不得將任何動物或其他禽畜帶進或帶上鐵路處所任何部分(但陪同失明人的引路犬則不在此限)」，違例者罰款$2,000。
2021年曾經有隻野豬BB誤登港鐵遊車河，由鰂魚涌搭到去將軍澳，但佢應該無被罰款$2,000。
9. 禁止攜帶影響到其他乘客嘅行李
港鐵入閘後禁止飲食，就好多人都知，但原來根據第27條，攜帶影響到其他乘客嘅行李，都係違法：「任何人不得─(a) 攜帶由列車運載或裝載時會有對任何人造成傷害或任何鐵路財物造成損壞的危險或對使用鐵路的其他人造成滋擾或不便的行李、物品或其他東西進入鐵路處所；或(b) 在已付車費區域內(港鐵公司或第三者從中國任何其他地方運載乘客到香港或從香港運載乘客到中國任何其他地方的任何列車除外)進食或企圖進食任何食物或飲用或企圖飲用任何飲品(不論是酒精類或非酒精類飲品)，違例者罰款$2,000。
好多人都會攜帶大型行李搭港鐵，但如果影響到其他乘客造成不便，亦有機會被罰款$2,000。
text/Joyce
photo/HKET圖片庫
港生活人氣本地熱話
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
↓【出POST即賺錢】《社群》再派錢！立即參加～↓
↓立即參加！賺取無上限現金賞💰↓
