.jpg)
寧願等多一班車，我都想陪多你一陣
文：熱豆腐仔
.jpg)
＊真人真事
有人話「曖昧」係最正最爽皮既階段，個種大家都捉唔透、望唔透，但又好想靠近既感覺真係既神秘又興奮
對方每一個若隱若現既行為都可以令你十分期待
有時可能會無乜話題，但大家似乎都好鍾意同享受
呢種感覺，你仲記得嗎？
.
「我今日玩到好開心呀…多謝你~」
「haha我都係呀~」
兩個就係咁企左係條街到，有種難捨難離既感覺
或者第一次見面，呢種離別感覺更加強烈
.
「不如…我陪你等車呀..」
男方終於鼓起勇氣，踏出第一步
而Tracy亦點點頭，一個微笑示好
畢竟兩個都未曾拍過拖
對方每一言一語、每一個行為都衝擊緊自己感官
.
街邊太多人與車
沿住巴士站既長龍，兩個嘗試緊不斷去搵話題
「係呢，你等陣搭咩車走呀？」
Tracy望住阿賢，而對方又有少少面紅回避佢眼神
.
「呃..呃….好似..我對面都有巴士…118」
「118？我屋企樓下都好似有喎～」
「真係架？但你唔係住南昌咩？」
「係呀～架巴士會去旺角方向架嘛～」
阿賢對於平時自己搭開既巴士路線，點都會有印象
.
「但係..好似唔經南昌..係咪長沙灣個邊呀？」
Tracy 係一個典型既路痴，只有中四既佢並唔知道太多交通路線
「好似係…南昌都好似幾近長沙灣~你信我啦」
如是者巴士路線就成為左兩個之間既話題
當你鍾意對方，真係咩都傾到一餐
.
「咁好啦我同你一齊上車，順便送埋你返屋企先再搭車走啦。不過如果你記錯，就要送我返屋企haha」
可能Tracy就係等緊阿賢呢一句說話
「吓！唔制haha」
.
未久，巴士就已經埋站
其實阿賢本身住港島，明明附近都有車可以返屋企，但可能心入面都想再同Tracy相處多一陣，所以最後都決定一齊上車
只係幾個站既時間，原來Tracy真係住得好近
但同時阿賢開始覺得唔對路..發覺平時118真係好似唔經呢到
但既然都已經上左車，就硬住頭皮繼續去
.
一落到車阿賢真係知道應該「奶左野」，發現周圍既環境都唔同左
「Tracy..呢到好似…我印象中好似架車唔係呢邊…」
「咩呀..無理由喎..我記得個就係個到」
Tracy指住前面一個車站
但阿賢仍然覺得唔對路，但避免Tracy唔開心都覺得唔緊要
.
.
或者處於曖昧階段既兩人都真係好著緊對方想法，如果比著平時個FD老點左你仲唔粗口都出埋咩！
而兩個人最後就好似遊客咁逐個逐個車站牌去睇
.
「無喎..」
「前面仲有」
呢個時候佢地同時間望住其中一個車牌..寫住18..
.
「哈哈..點解會少左個1字既」
Tracy用一個笑容去逃避呢個事實
而對呢個情況，阿賢都只可以一齊去笑
「你死啦，你要送我返屋企啦haha」
「吓…唔好啦…放心…我會幫你搵到既..ha」
「講笑姐，放心啦，我會搵到架！不過我要睇下自己係邊先！」
阿賢就攞左個google map出黎
.
「我知啦，我行番出去長沙灣個邊就有巴士啦」
「咁我陪你過去啦」
「唔洗啦，都到左你樓下，不如..我送埋你返去先啦」
「唔洗啦..我陪你等埋車先啦」
兩個又再次拉拉扯扯
其實，大家都唔捨得對方
.
最後變左好似情侶一樣飯後散步，一齊行去長沙灣
.
呢個時間又唔知點解條街無乜人，又或者好少人會行呢段路
就係呢十幾分鐘，成個世界就真係得番兩個人
雖然雙方都無乜講野，但相信佢地好想條路可以長D
.
「咦，係咪你架車呀？」
突間一架118係馬路經過
「算啦，我廢時跑，好快有下架」
而可能因為岩岩走左車，個站完全無人排隊
.
「你依加仲有冇咁凍呀？」
阿賢突然碰一碰Tracy隻手
「依加好D啦」
「但你都仲係凍喎」
阿賢突然將自己雙手包圍住Tracy雙手
「你等陣返到去記得wtsapp我，小心D」
「嗯.」
.
五分鐘又有架118黎緊
歡樂既時光過得真係特別快
「你..有車黎啦」
Tracy望住遠處既巴士，嘴內頭非常之依依不捨
阿賢見到佢咁既樣，都有D唔係好捨得
曾經佢有諗過再陪番Tracy返屋企先..但係最後都無做
.
.
而就係巴士埋站之際，阿賢並無走上車
「你做咩呀，架車走啦～」
阿賢仲係原地不動，最後兩個一齊望住架巴士離開
.
「我..想陪多你一陣…」
從Tracy呢刻既笑容，相信已經勝過一切千言萬語
就係咁，佢地兩個就傻下傻下咁繼續吹風
.
.
初戀之所以咁難忘、深刻
係因為大家都會不知覺咁為對方做一D好傻既事
.
為左你唔捨得上車，為左你願意一齊係街到吹風
你一笑一動都彷彿牽動著我，離別之時還將手牽到最後一刻先放開
係旁人眼中或者你地兩個真係傻傻地
但呢種傻事，絕對成為初戀其中一個印記
.
其實自己都唔知點解會咁
但淨係知道…我只想陪多你一陣
.
.
年月流逝，或者好多人拍耐左拖已經忘記左最初既呢種感覺
那些年呢D傻事、呢份甜蜜，你地仲記得幾多呢？
本篇圖文獲作者熱豆腐仔授權刊登，未經准許，請勿轉載！
熱豆腐仔 Facebook: https://www.facebook.com/hothottofu/
港生活人氣本地熱話
↓【限時搶⚡】原箱高鈣梳打餅↓
↓黑芝麻 / 芥末味｜口感香脆、高鈣健康↓
↓【限時搶⚡】Lanluis MGO520+紐西蘭麥蘆卡紅蔘蜂蜜便攜裝↓
↓補氣血｜改善睡眠品質｜促進腸道健康↓
