一句話惹毛系列：「屯門係咪有牛架？」
文：B612
唔計新年流流被問候：「幾時到你結婚呀？」呢句之外，我最怕就係比人問住邊。每次當我答係「屯門」嗰陣，大家嘅創作力量同幻想，九成九都會嚇我一跳。
我要重申，其實早喺四十幾年前，屯門就已經開始發展為新市鎮，有50萬人住緊，相當繁華。有興趣嘅可以去屯門市中心兜返轉睇吓，嗰咋商場（係一「咋」商場，量詞無用錯）一早變咗強國人購物集中地，迫到乜咁。
所以，唔‧好‧再‧答‧我：「咁遠？！屯門係咪有牛架？」無，真係無，想要牛嘅或者你去大嶼山。
但係話屯門偏遠呢，無可否認係事實。相比起元朗，雖然大家可能會覺得佢更多村屋、平地，好似遠D，但其實有大欖隧道，加上西鐵路線係先入元朗再入屯門，交通方便過屯門好多。自從大學畢業之後搬返屋企住，每次諗起「屯門公路」四個字我都幾乎標晒冷汗。
屯門公路嘅神奇之處，係佢唔似得中上環咁只會係返工放工時間塞車，而係全天候24小時都有得塞，而且天天塞、晚晚塞，年中無休，X你老母。
每一次搭行屯門公路嘅車，都是理智與感性的對決。搭巴士係無錯舒服D有得坐又唔洗轉N咁多次車，但一旦有交通意外、壞車之類，成條屯門公路千千萬萬人就仆街冚家鏟喇，塞喺屯門公路又唔郁又唔落得車轉地鐵，完全係困獸鬥。每次一塞車，成車人就會媽聲四起，陸續各自收到電話比老闆／同事追問點解（又）仲未到，然後同是天涯淪落人，流淚眼望流淚眼。你夠唔夠膽一個禮拜三日遲到，老闆問你點解跟住大模施樣答佢：「因為我住屯門！」丫？我唔夠膽，所以焗住日日迫粒幾鐘無得坐嘅西鐵，來回新界港島，仲要搏港鐵生生性性唔好壞車。
次次同朋友去完街，無論喺香港邊一個角落，預返一粒至粒半鐘返屋企都實無死架喇，仲要間唔屎塞吓車。D朋友連涼都沖好，我都仲係捱眼瞓轉緊車。唔係住屯門嘅人，點會明嗰種痛苦？人生……
本篇圖文獲作者B612授權刊登，未經准許，請勿轉載！
B612 Facebook：https://www.facebook.com/b612lpp/
作者其他文章：
>> 每年派花紅前夕，總有一場腥風血雨
>> 毛記電視，你係得嘅！
港生活人氣本地熱話
↓【限時搶⚡】原箱高鈣梳打餅↓
↓黑芝麻 / 芥末味｜口感香脆、高鈣健康↓
【請您去】iSQUARE國際廣場「爆」趣童玩之旅💥
↓ Striking爆炸糖Strikids(爆炸仔)小隊✨ + 本地懷舊玩意元素🙌 ↓
