西斜樓夏天會好熱？要長開冷氣電費會好貴？ 網民熱討：西斜樓到底有咩好有咩唔好？
租樓又或者買樓時其中一個要考慮嘅因素就係坐向，好多時都聽到人講話買樓唔好揀「西斜樓」，即面向西邊嘅單位，而其實住「西斜樓」又會有咩唔好呢？最近就有網民喺香港討論區上發帖，詢問一眾網民到底住「西斜樓」係咪會因為要成日開冷氣，令到要交更多嘅電費呢？隨即引起一眾網民熱烈討論：住「西斜樓」有咩好有咩唔好？
電費貴成千蚊？坐北向南先最好？
樓主發帖表示自己有朋友認為住「西斜樓」夏天時必定要開一整日冷氣，而電費就一定會好貴，並認為「西斜樓」只有朝早唔使開燈呢一個好處，所以就抱住好奇心向一眾網民詢問究竟住「西斜樓」係咪會比起正常嚟講要交更多嘅電費呢？有網民就對此表示認同，認為住「西斜樓」屋企需長開冷氣，電費亦會相對地貴：「一定貴，幅牆都曬到熱，間房如焗爐，你試過先知」、「我屋企係向西北。我同意電費係貴d(啲)，我覺得一年貴1500-2000蚊左右」、「不嬲就係，曬到你屋企熱騰騰，實長開冷氣，電費一定貴」
有不少網民亦隨即抱怨住「西斜樓」的苦況：「我住過西斜，熱到x街要長開冷氣」、「以前住向正西樓，夏天6點半收工返到屋企，全屋熱辣辣，仿皮梳化熱到爛，Router都熱壞咗部，唔開冷氣怕中暑」、「如果你日日留係屋企就知幾熱，仲要冷氣開大好多，人地秋天已經可以開風扇，你就仲被迫涼冷氣。唔好以為夜晚可以唔洗開，西斜焗熱係夜晚八點都未散」、「西斜真係幾討厭，日落時候嘅陽光，又用唔到黎曬衫或者曬下間屋，個太陽仲要水平咁對住你，近窗位會熱好多」，另外有網民則認為買樓要揀向東或向南嘅單位：「東丶南是基本，吾(唔)係話會特別涼，但只少吾(唔)會有更多問題，同埋間中會好風，而且又未必貴好多」、「買樓最好坐北向南，北暖夏涼，又有小小陽光入屋」、「正常都不會考慮西斜樓，熱死」
有網民以親身經驗表示住「西斜樓」電費一年貴大約$1500-2000。
有多位網民抱怨住「西斜樓」夏天會超熱，被迫要長開冷氣機。
有陽光先唔怕發霉？用遮光窗簾減少影響？
雖然有網民就抱怨「西斜樓」夏天時會好熱，但亦有不少網民認為「西斜樓」亦有其的好處：「我(住)向西，夏天晚上吹正西南風，28-29度唔係晚晚要開冷氣，換轉頭冬天避開左北風」、「我住近西斜樓，天天傍晚看無敵日落景」、「其實我中(鍾)意西斜，因爲間屋有陽光入屋好緊要」、「光猛，曬衫好快乾，陽氣十足，朝氣勃勃」、「西斜樓夏天沖涼唔洗(使)開熱水爐」，亦有網民表示住「西斜樓」就唔怕潮濕：「我都租緊間西斜近海，係會熱d，不過有太陽入屋都好，曬衫方便同無咁潮濕」、「有陽光入屋，啲牆唔會發霉，好呀」、「重點間屋乾爽，不會生眼挑針。我租住過甚少陽光入屋的房，陰濕，細菌滋生嚴重，還不通風。。。狂生眼挑針！」
另外亦有網民為居住於「西斜樓」嘅人提出一些建議，以減輕當中嘅影響：「西斜樓唔一定熱，如果係窗向西，只要用厚身遮光窗簾已可隔熱，玻璃窗又唔會吸熱」、「正西斜樓，安裝左電動窗簾，西斜時間自動關窗簾，唔系(係)好熱」「我住的地方也是西斜，窗上玻璃可貼隔熱模(膜)，最好去淘寶選，款式多、清晰度高、不太影響窗外景觀，裝了後電費是(減)少了」、「向西買冷氣機記得買大一匹，否則開到日落先會凍」、「冷氣機用變頻，不會花很多電的。」
有網民則認為「西斜樓」有日落景睇、唔怕潮濕發霉及曬衫方便等好處。
有網民提出可用厚身遮光窗簾、隔熱膜及變頻式冷氣機以減輕「西斜樓」當中的不良影響。
港生活人氣本地熱話
【樂迷注意🎧】《社群》請您免費聽歌三個月！
↓【限時搶⚡】Lanluis MGO520+紐西蘭麥蘆卡紅蔘蜂蜜便攜裝↓
↓補氣血｜改善睡眠品質｜促進腸道健康↓
