大圍柏傲莊，純粹比較鐵路交通，的確係最屈機！
雖然有網友覺得「呎價樓齡都唔同，有咩好比」，但事實係大家都熱烈討論，意見紛紜，但似乎以大圍及將南嘅票數最高。「大圍勝，大西北最垃圾，其他是但」、「純粹比較鐵路交通，佢的確係最屈機」、「大圍>將南>康城>荃西>Yoho>瓏門」、「大圍無得輸 >將軍澳南 >康城，荃灣西大（太）臭，搞唔掂，大西北去都唔想去」，「大圍柏傲莊No. 1！返大陸又得，過海又得，大型一線商場，舊區街市又有，小店食肆，文青Cafe，大量美食，各大型連鎖餐廳，應有盡有」，但有網民認為大圍有缺點：「只差在個景觀」﹐但跟住有網民列點力撐大圍優點多：「整體算非常開陽（揚），有一邊仲有城門河景（雖然冇嘢好睇），綜合比較：1.樓宇新舊：全新新世界樓，交樓標準有返咁上下；2.去地鐵站速度：冇人能及，搭lift直落去站入面；3.起居飲食：幾乎乜嘢餐廳都有，串燒，打冷，打邊爐，茶餐廳，粥粉麵飯，中菜，越菜，東南亞美食，仲有唔少米芝蓮推介餐廳；4.購物：負擔得起嘅，可以去商場高級超市，想食得好啲嘅，隔離有街市，仲有好多街邊檔，藥房都10間；5.會所設計：特大型綜合會所，對於有小朋友嘅家庭嚟講係一個頂級選擇，新世界花咗好多心機係親子樂園裏邊。」
網民認為呢6個新界鐵路沿線屋苑，論交通方便度，大圍柏傲莊無得輸！
大圍站可以搭到東鐵線及屯馬線，名副其實係四通八達。
有網民覺得除咗交通方便，大圍區嘅生活配套設施以及食肆選擇多，絕對係買樓首選嘅地區。
將南似英國小區，啲風景同餐廳都勁chill，唔似身處香港？！
但亦有網民大力支持將南（將軍澳南部），仲將以上幾個區域嘅優缺點逐一分析：「將南>荃西>康城>大圍。將南去過一次就知世一，本身tko已經新市鎮，成個區規劃得好好，即使舊啲嘅三寶果頭都好企理，行到去將南就成個英國小區咁，唔係高樓大廈，十幾廿層，每屋苑都好有特色。去到海旁仲正，啲風景同餐廳都勁chill，唔似身處香港咁，你平時行一轉勁多鬼佬同日本人。加上附近多公園自然環境好好。配套都好好，有gym、單車徑、商場、aeon、DONKI、壽司郎、NOC，完全啱晒年輕人。荃西配套其實正過將南，仲多餐廳同民生嘢，交通仲方便，但海太臭，同無將南果種vibe，太近舊荃灣，又戒毒所又唐樓好撚多廢老，呢個係舊區永遠改變唔到，同埋荃灣太多外區人去行街，住果度星期六日係唔會想出街。康城雖然同將南差一個站，但交通同配套完善兩回事，仲有十幾期60層樓高嘅屋苑，好壓迫。大圍都係舊區，唔啱年輕一代，配套都麻麻，係得交通優勝。大西北無得比，差太遠」。
不過有網民就認為將南絕非以上網民所講咁好：「將南夏天行去地鐵站真係好熱，之前都睇過但最後放棄咗，除非渣車」，「將南世一 ，將南似英國小區 將南勁多鬼佬同日本人咁都講得出！昆阿婆呀？」、「將南teller當banker，南亞人當外國人」，
網民認為將南（將軍澳南部）整個地區嘅規劃好好。
有網民甚至認為將南海旁，風景同餐廳都勁chill，仲有好多外國人，唔似身處香港。
荃灣西去港島快捷、瓏門北上方便
雖然荃灣西海面嘅離奇臭味相當馳名，不過都有網民認為荃西都有地方可取：「海景就荃西/將南/康城囉！抵住就梗係大圍啦，發展商起2次，咩都抵番哂！講北上就瓏門啦，方便快捷又唔使同啲雞鴨鵝迫羅湖！」、「荃西不錯，去港島好快」、「荃西=大圍>Yoho>瓏門>TKO>康城。荃西：臨海靚景，半市區；大圍：過海近；Yoho：商場配套無敵，西鐵唔算太遠，巴士5分鐘到大欖港島35分鍾車程，近落馬洲/新河套區；瓏門：西鐵兜太遠、屯公死症、近機場/深圳灣；TKO/康城：堆填厭惡區，唯一好處近港島東/九龍東商業區，去西九/中西區對比元朗優勢唔大，九東港島東商業發展前景唔夠北部砌」。
雖然唔少人話荃灣西海面有異臭，但好多網民覺得有靚海景，去港島好快，都值得考慮。
屯門瓏門嘅評價偏低，不過亦有網民認為若果要經常北上，都算方便快捷。
text/Joyce
photo/HKET圖片庫
============
同場加映：
【蝸居睇樓團】青衣800呎3人1犬之家 海量魚竿收藏室、BTS粉絲Dream Room
