甄子丹再任「寶馬香港打吡大使」 愛女甄濟如入行做歌手：佢真係食呢行飯
年度馬壇盛事《寶馬香港打吡大賽》將於3月24日假沙田馬場隆重舉行，賽事總獎金更高達港幣2,600萬港元！今年再度邀得國際影星甄子丹擔任「寶馬香港打吡大使」，自2014年起他為打吡大賽拍攝過不同類型的宣傳片，不時走訪馬場「禁地」與馬匹或騎師交流。這次宣傳片有別過往，以甄子丹的操練日常及其演藝事業作為主軸，以自身經驗表達「專注」、「決心」及「堅持」三大致勝元素，貫穿他與賽馬團隊甚至馬匹本身，為爭取最佳成績的強者態度。
同場加映：孔德賢望年輕演員多磨練多進步 「作品唔可以抹走過去但睇到努力」
拍攝當日，其中一個鏡頭是甄子丹於木人樁前出拳、踢腿，這些動作對國際武打巨星的甄子丹來說當然是易如反掌，但他於正式roll機前，仍特意與導演、攝影師溝通，務求令每個鏡頭的擺位、取景及動作流暢而精準。拍攝時，除了大多數鏡頭是一take完成外，他更會比導演要求的動作做多少少，讓導演有更多鏡頭剪接用，如此細緻的工作態度，令整個拍攝過程相當順利。 甄子丹做事精準、專注，他直言是為了不想後悔：「時間寶貴、生命寶貴，如果每樣事唔精準去做，會有少少遺憾，你會話畀自己聽，點解初初你唔做得更好呢？所以而家嘅我，尤其我拍戲咁多年，我唔希望電影方面冇進步空間，所以我放更加多時間去做每個電影項目。」這份態度成為他的動力，時刻追求盡善盡美：「當然唔可以話perfect，但係你有心去做就自然有機會去做得更好。」
甄子丹對工作的熱誠態度令事業屢創高峰，再度獲邀成為「寶馬香港打吡大使」，甄子丹表示： 「再次成為打吡大使當然好開心、好榮幸、好難得！除了對馬會，我對打吡呢個盛事亦有一份多年嘅感情。」他提到宣傳片另一位主角——上屆《寶馬香港打吡大賽》冠軍賽駒「遨遊氣泡」，賽前雖然未被看好，但最終亦能奪得這份至高榮譽，甄子丹回想去年情景說：「我好記得亦好興奮，睇住佢（「遨遊氣泡」）跑出嚟，由大家唔睇好，到最後佢攞到個榮耀，我都戥佢哋好開心，其實係好勵志嘅例子。」他希望可以藉着賽馬運動，吸引年輕一代欣賞盛事之餘，更可從中看到信念、堅 持與努力的重要性，透過賽馬運動激勵他們。 現在的甄子丹成就非凡，但他坦言自己過去亦曾經不被看好，表示：「人唔會樣樣都一帆風順，一 定會有阻滯，甚至乎跌落地下，最重要保持信念、堅持同努力。機會嚟到，就可以勇往直前，爭取 到更高嘅高峰。」
對於「專注」、「決心」及「堅持」三大致勝元素，甄子丹指無論做任何事情，都應該有這三種信念：「唔好放棄，話畀自己聽，雖然過程唔係事事順暢，但會好快過去，之後就會有另一個高峰， 見到成功帶來嘅滿足感。只要抱住進取心，就會克服所有困難，做人亦如是，每日都要經歷好多小問題、困難甚至波折，但係唔緊要，最後你能夠過到呢一關，就會獲得更多。」家庭生活同樣幸福美滿的甄子丹，可說是人生勝利組。他笑謂婚姻生活不單純於專注、決心及堅持，這個階段的自己亦不需要刻意維繫，因為已經是「自動波」，不用記著，就像與生俱來。語 畢，流露甜蜜笑容，幸福之情不言而喻。
至於愛女甄濟如早前以歌手身份正式出道，作為開明好爸爸的甄子丹，認為每個父母亦會與子女分享自己的人生經驗，但是他認為讓子女親自闖闖更有意義：「而家後生仔女好聰明，佢哋有自己諗法，亦都應該畀佢哋嘗試自己去闖一闖。因為無論成與敗，一時嘅失敗唔等於將來唔會成功，有時有少少挫折反而知道人生條路點樣行，我同太太都用比較開明嘅方法同佢哋相處。」對於將來與女兒在演藝上的合作，甄子丹暫時沒有想法，並謂：「順其自然啦。初初我哋冇諗個女走呢行，的而且確由細到大佢好鍾意音樂，9歲開始唱歌，14歲已經寫咗好多首歌，呢方面的而且確係有天賦。最初好多唱片公司想簽佢，但我哋一直都想佢讀好啲書先，到後來我發覺佢真係食呢行飯，有呢方面嘅天賦，所以而家由佢享受吓先，汲取多啲經驗。」
撰文：娛樂組
港生活人氣娛樂新聞
【免費送Rollink旅遊系列✈️🌍】
↓ 帶走人氣摺疊旅行喼 x Mini Bag！↓
【社群送禮🌸】送您麒麟一番搾啤酒及「和風櫻花禮品套裝」！
↓簡單一步登記贏禮物！↓
